വരയുടെ ഇപ്പുറം
>> Saturday, August 1, 2009
ഇവിടെ
നീയെന്നെ അറിയുകയേയില്ല
കാരണം
ഞാന് മരിച്ചിട്ട്
നാളുകള് കഴിഞ്ഞിരിക്കുന്നു
പേരില്ലാത്തൊരാളുടെ
ഹൃദയത്തില്
കുത്തിവരച്ച വരകളും
പുഴുവരിച്ച് തീര്ത്തിരിക്കുന്നു
എന്റെ ശ്വാസത്തില്
നീയെഴുതിയ പേര്
രക്തത്തില്
നീ കുറിച്ച വാക്കുകള്
ജീവനില്
നിന്റെ ജീവനെ കാര്ന്നുതീര്ത്ത
നഷ്ട പ്രണയം
സ്വന്തമാണെന്ന് ഉറപ്പില്ലാഞ്ഞിട്ടും
ഒക്കെയും
മരണശേഷവും എനിക്കു തന്നെയെന്ന്
ഒസ്യത്തെഴുതിയിരുന്നു
മരിച്ചിട്ടും മരിക്കാത്ത സ്വാര്ത്ഥത
അങ്ങനെ
നിനക്ക് കാണാനും
കേള്ക്കാനുമാവാത്ത ചിലതുണ്ട്
നിന്റെ ലോകത്തിനും
എന്റേതിനും തമ്മില്
ഉടമ്പടികള് ഏതുമില്ല
ഒരു ബാര്ട്ടറും നിലവിലില്ല
അല്ലായിരുന്നെങ്കില്
മുറിവിനു പകരം
ഒരു അന്ത്യ ചുംബനം വാങ്ങാന്
തീര്ച്ചയായും ഞാന്
ശ്രമിക്കുമായിരുന്നു
ഇവിടെ
നിനക്ക് തിരിച്ചറിയാന്
അടയാളമൊന്നും ബാക്കിയില്ല
മടങ്ങുക കണ്ണേ,
മടങ്ങുക.
